Tit 2 | GAM | STEP | Ba alla God kandjiye du dje paro ge, ni una dje aumbenka singare embe yene.

Titus 2

God wopake kando mal ge iwoga anagama kambono singare embe yene

1 Ba alla God kandjiye du dje paro ge, ni una dje aumbenka singare embe yene. 2 Ni iwoga kambono dje aumbenka nu wain no dall nayene. Wambo napanda, yenekne singare kanpol to, nomane wopake panda moye. God boll pillgi djinj ge paro mal djine, una kane wopake ye aune ge paro mal yene, ib kakne ge paro mal kakene. 3 Anagama kambono mor ge, ni para aike dje aumbenka ga God singare wopake kando mal ye wanne. Nu wain merke nanane. Una dje ke naye, wal wopake paro kandja ge beke aune. 4 Anagama kambono kandja embe dje auneke, ana komdjill kambono wogane wombane aike kane wopake yene. 5 Yenekne kanpol tane, God nale al wopake molo, ana numbine al kogo panda ge ye kune ye, singare wopake ye, yenekne wogane menameto moye. Ga singare embe yei dal, una God kandjiye dje ke nayene.

Taitus singare wopake yendaka iwa komdjill kambono kane karkar yene.

6 Ni ana komdjill kandja dje awin mal ge, alla iwa komdjill moye al dje aumbenka ga singare yene ge kanpol tane. 7 Wal porapora ni pille yemben ge, ni singare wopake eri yembenka, iwa komdjill kambono kane karkar yene. Ni kandja dje una beke aumben al ge, ni kandja djinden mal nenem singare embe yembenka, nomanin gi djindaka, kandja kaima dje una aumben. 8 Kandja panda mal dje aumbenka, una ni kandja ale ye djinden we djine ge kune nayenda. Embe djin dal, kunda yem una kandja ke dje nono naune, ngandjill goye.

Una kantau yenj una kandja djine mal, nu kogo una pille karkar yene

9 Nu kogo yenj una mor ge ni kandja embe dje aumben, ye menameto moyeke, kantau yenj una plato moye. Ga kandja djine mal ye pille yeneke, iwa kerman kambono wopake piye. Kantau yenj kambono kandja djine ge ye to naworne we djimben. 10 Kantau yenj una kambono wal kane nane moya ge kunumb nanane. Kandja djine mal karkar ye, kambono kanne, ga kunumb nanoi una mor dje kanne. Singare wopake embe yei dal, God nono i yem wori iwa moro we dje una beke aunmon ge, una pille wopake piye.

God singare ye paro mal nono karkar ye molo Krais wonda dje kui yembon

11 Nono kanmon, God nono wandill golo awi ge, er pene woi pora dji, una porapora i yem worda kune yendo. 12 God nono wandill golo awi mal ge nono beke aundaka, nono God mop aunmon ge kere, makimb al nomane ke panda ge kerbon. Une nono wandill golo awi mal ge nono beke aundaka, nono makimb al kond wanbon ge, nonekene kantau wopake ye, kondwe du dje wane, God singare yendo mal embe ye, 13 God wal wopake kaima are wonda we dji ge, nono wo pille kui yembon. Ge Jisas Krais nono Godne kerman i yem wori iwa wonda dje pille kui yembon. Kupill al poll djindaka, God yembe dongall pandaka une yem wonda kanbon. 14 Krais yene nono pille awi. Nono singare ke porapora ge kere auno dje, nono yene wombaye wopake mopon dje, nono wo pille singare wopake ye mopon dje pille yene nono awi. 15 Na pepa bolo wondo mal ge, ni dje una aumben. Una ni kane kal wori dal, ni napupen, kandja ge yembe ke ye dje pa mopenka una kandja to worinj una alla nadjine.